06/11/2013 12:59:03

PD, kushtet tona për Gjykatën e Lartë

Kreu i Shtetit vijon takimet konsultuese me krerët e tjerë të grupeve parlamentare

TIRANË - Kryetari i grupit parlamentar të Partisë Demokratike, Edi Paloka tha të mërkurën se PD do të mbështesë kandidaturat që do të propozojë Presidenti i Republikës për Gjykatën e Lartë, nëse ato do të plotësojnë kriteret e parashikuara në ligj. Presidenti Bujar Nishani po zhvillon sot takime konsultuese me kryetarët e grupeve parlamentare, lidhur me emërimet e reja në Gjykatën e Lartë. Takimet nisën me kreun e grupit parlamentar të PS-së, Gramoz Ruçi për të vijuar me kryetarin e grupit të PD-së, Edi Paloka. Pas takimit, z. Paloka tha për gazetarët se në bisedë me Kreun e shtetit nuk u fol për emra konkrete, por për kriteret që duhet të plotësojnë anëtarët e rinj të kësaj gjykate. "Nuk ka emra, por në momentin që presidenti do të përcaktojë emra dhe nëse kriteret për to do të zbatohen, absolutisht ne do të jemi dakord. Nuk i kemi kërkuar emra dhe nuk kam paraqitur asnjë emër, por kemi biseduar për kriteret. Presidenti shpjegoi edhe procedurën dhe presim dekretimin e emrave", nënvizoi Paloka. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin